महिला दिदीबहिनीहरूको महान चाड हरितालिका तीज २०८१ को अवसरमा साल्पासिलिछो-१ कुलुङस्थित वीरेन्द्र माध्यमिक विद्यालयको प्रांगणमा भव्य कार्यक्रम आयोजना गरिएको छ। श्री जालपादेवी आमा समूहको पहलमा आयोजित यो कार्यक्रम वडा १ र २ का अन्तर आमासमूहबीचको वक्तृत्व कला प्रतियोगिता र तीज विशेष सांगीतिक प्रस्तुतीले भरिपूर्ण रह्यो।
कार्यक्रममा सहभागी महिलाहरूले आफ्नो प्रतिभा र विचार प्रस्तुत गर्दै तीज पर्वको सांस्कृतिक महत्व र समसामयिक विषयमा आफ्ना धारणा व्यक्त गरे। वक्तृत्व कला प्रतियोगिताले महिलाहरूलाई सशक्तिकरण र व्यक्तित्व विकासका लागि प्रेरणा प्रदान गरेको छ।
साथै, तीज विशेष सांगीतिक कार्यक्रममा उपस्थित दर्शकहरूले परम्परागत तीजका भाकामा रमाउँदै सांस्कृतिक पर्वलाई अझ उत्साहपूर्ण बनाएका थिए। यो कार्यक्रमले महिला दिदीबहिनीहरूलाई एकता र आपसी सद्भाव बढाउन सहयोग पुर्याएको छ।
कार्यक्रमको सफलताका लागि विद्यालय प्रशासन, आयोजक समिति, र सम्पूर्ण सहभागीहरूको भूमिका सराहनीय रह्यो। यो प्रकारका कार्यक्रमले विद्यालय र समुदायलाई एकताबद्ध गरी संस्कृतिको जगेर्ना र नवप्रवर्तनका लागि प्रेरित गर्ने विश्वास लिइन्छ।